ပွင်ႈၵႂၢမ်း

ၵႂၢမ်းတႆးႁူမ်ႈၵၼ် လိၵ်ႈလၢႆးၽႂ်မၼ်း၊ တိုၵ်းသူၼ်းၸႂ်ႉတိုဝ်း ၾွၼ်ႉယူႊၼီႊၶူတ်ႊတႆး

•  
• 

Details

  

Created on Monday, 20 January 2014 13:38 

Published Date 

Written by သဵင်ၵူၼ်းမိူင်း

ၽူႈလူင်ႉလႅၼ်ႇၽၢႆႇလိၵ်ႈလၢႆးလႄႈ ၽၢႆႇဢၢႆႊထႆႊတႆး လၢတ်ႈၼႂ်းပၢင်ၵုမ် ၽႃသႃလိၵ်ႈလၢႆး ၵႂၢမ်းလၢတ်ႈလႄႈ ဢႆႊထီႊ(IT)တႆးဝႃႈတႃႇ ၶိူဝ်းတႆးတသေိုပ်ႇၸုၵ်းမၼ်ႈၼိူဝ်ၶိူဝ်းတႆးလႄႈသိုပ်ႇ ပဵၼ်တႆးၵႂႃႇ မိူဝ်းၼႃႈ တၵ်းလႆႈၸႂ်ႉတိုဝ်း ၵႂၢမ်းတႆး ႁူမ်ႈၵၼ် လိၵ်ႈလၢႆးၽႂ်မၼ်း။ ၽၢႆႇဢၢႆႊထီႊ တိုၵ်းသူၼ်းၸႂ်ႉတိုဝ်း ယူႊၼီႊၶူတ်ႊ ဢၼ်လုမ်ႈၾႃႉ ယွမ်းႁပ်ႉ မၵ်းမၼ်ႈပၼ်ႁဝ်းယဝ်ႉ။ သိုပ်ႇၸႂ်ႉၸေႃႇၵျီႇတႆးၵႂႃႇတိၵ်းတိၵ်းတႄႉ တေတူၵ်းလွၵ်းပိူၼ်ႈ ထိူင်းထိူဝ်ႉ ထိူင်းထိူဝ်ႉသေ ဢမ်ႇၶိုတ်းတၼ်းပိူၼ်ႈလႆႈသေပွၵ်ႈ။

ၼႂ်းပၢင်ၵုမ်ၽႃသႃလိၵ်ႈလၢႆး ၵႂၢမ်းလၢတ်ႈလႄႈ ဢႆႊထီႊ(IT) တႆး မိူဝ်းၼႃႈဢၼ်သမႃးၶူမ်းပၢႆး ပၺ်ၺႃ တႆးလႄႈ ၵေႃလိၵ်ႈလၢႆး ၾိင်ႈငႄႈတႆး (ၵဵင်းမႆႇ) ဢွၼ်ၸတ်းတီႈဝတ်ႉၵူႇတဝ်ႈ ဢိူင်ႇသီႊၽုမ်ႊ ၸေႈဝဵင်းမိူင်း ၸေႈတွၼ်ႈ ၵဵင်းမႆႇ ၸိုင်ႈထႆးပွတ်းႁွင်ႇ တင်ႈတႄႇဝၼ်းထိ 18-19/01/2014 ၼႆႉ မီးၽူႈလူင်ႉ လႅၼ်ႇၽၢႆႇလိၵ်ႈလၢႆး မိူၼ်မႁႃမုင်ႉ (မိူင်းၸႄႈ)ႁိုဝ် ၸဝ်ႈပိုၼ်ၶမ်း၊ ဢႃးၸၢၼ် ၶိုၼ်းသႂ် ၸႂ်ယဵၼ်၊ ၸဝ်ႈၶမ်းႁၢၼ်ၾႃႉ၊ ၸၢႆးသႅင်မိူင်း မင်းၵွၼ်း ႁူဝ်ၼႃႈသမ်းမႃးၶူမ်းပၢႆးပၺ်ၺႃတႆး ပႃးၸဵမ် ႁူဝ်ပဝ်ႈ ၵေႃလိၵ်ႈလၢႆးလႄႈ ၾိင်ႈငႄႈတႆး (ၵဵင်းမႆႇ) ၸၢႆးသႅင်ယႃႉ။ ၽၢႆႇၽူႈလူင်ႉလႅၼ်ႇဢၢႆႊထီႊ မီး ၸၢႆးပဵင်းၾႃႉ ၶူးသွၼ်ၶွမ်ႊ သိုဝ်ႇႁႅင်းၼုမ်ႇ၊ ပီႈၸၢႆးလူင် လုၵ်ႈႁဵၼ်းၸၼ်ႉၸွမ် PhD ၸၼ်ႉၸွမ်မႁိ ၻူၼ်း မိူင်းၵွၵ်ႇ ၸိုင်ႈထႆး၊ ၸၢႆးပီႇယႃႉၽူင်း ႁိုဝ် ပုမ်ပႅင် ပုမ်ၶႆ ၽူႈၵုမ်းဝႅပ်ႉ Shanlaod.com၊ သင်ၶ ၸဝ်ႈ လႄႈၸုမ်း သိုဝ်ႇၶၢဝ်ႇ ၽူႈတွႆႇႁွၵ်ႈ ပၢင်လူင်၊ သိုဝ်ႇႁႅင်းၼုမ်ႇ၊ တႆးလွတ်ႈလႅဝ်း၊ DVB ပႃးၸဵမ် လၢႆမူႇလၢႆၸုမ်းလႄႈ ပီႈၼွင်ႉႁႅင်းၵၢၼ်ယၢၼ်မိူင်း ၼႂ်းၸိုင်ႈထႆး တင်းမူတ်း 70 ပၢႆ။

တီႈဝဵပ်ႉ သိုဝ်ႇႁႅင်းၼုမ်ႇ